Saturday, 30 December 2006

To start Ajebo no be problem....(Pidgin)

My 9ja people them say "to start ajebo no be problem, na to maintain am be the issue." You fit? I been no know the wahala wey dey involved to friend oyinbo man (abi na boy i go call am). Since i begin friend oyinbo i neva see the kind thing wey i see this year. One small boy wey i been dey friend this year nearly put me for wahala, infact na gbese i dey na. To friend oyinbo no easy...if we dey go party we go carry drink go...me sef go carry wetin i go drink. If we go out me go pay my own too... the one wey shock me na one day wey we dey go bbq for him friend house. I buy my own MEAT carry go. Wetin person dey see for london.
So, my question na be say, what if we dey go owanbe, na so i go cook rice with amala carry go?

This kind life i no sure say i fit maintain because no be so dem take train us, my friends don laugh me tire. At least 9ja man know e duty, e know say "soup wey sweet na money kill am", at least he go still assist you to do fine hair. When i been dey friend one oyinbo na every 2 weeks i dey change my hair (after he go go display me for im yeye friends). I no sure say i fit dey change hair and dress everyday. As we dey enter this year so, i don renounce my ajebo lifestyle, now na full kpako i be.

I don tire to chop steak, foie gras, chateaubriand and drink chardonnay...now na amala, fufu, lafun, shaki, abodi, roundabout with ewedu i wan chop then I go wash am down with palmwine.

M'je

7 comments:

Anonymous said...

Who send you message? No leave oyinbo o...stay with them, when gbese go full your hand na then you go know....no run come meet 9ja men when fire burst. Oloshi...ok, i dey joke. Just use shame do U-turn come back to your own people...i sure say we go still accept you...see as your mouth be like roundabout and abodi.
xxx

E_ji80 said...

Babe, I don laugh so tay belle dey pain me. U no lie sha, na when I been dey go out with omo-oyinbo, naim I realise say when person invite you come their house for a drink, you suppose bring drink when you dey come. see me see wahala. if you no get drink for house, why you tell me say make I come drink?

mamuje said...

My sister, no be small thing...they way wey things be na e be like say na to find one Nija boy wey go dey take me out dey buy me Mr Biggs as e be say hinger go nearly finish person enemy for here. I still dey laugh....

Anonymous said...

make una dey laff ooooo no leave oyibo come follow ur black brothers wey know say if u dey do party drink go dey berekete n they no expect u to carry anything come cos e go be like say u dey insult them....
if u wan dey buy ur own drink evry weekend then stay put with oyibo else
join the band wagon of ur black brothers

mamuje said...

My sister e no easy at all. Laugh wan finish me, anytime i read am na laugh i still dey laugh....

ayodeji said...

I remember the oyibo buddies I get here. Any time I pay for everybody's food and drink, na so dem go look me like say I don craze. Even to go watch football for dem house, you must to bring your own refreshment. Make you leave oyibo people with dem idea; we go keep our own too, shikena.

Anonymous said...

Too funny , yet so true.